Nuk ka prova për trukimin e ndeshjeve, lirohet nga akuzat Armir Grima

Armir Grima, ish-trajneri i kombëtares së femrave në futboll dhe ish-portier i Vllaznisë, i arrestuar së bashku me grupin “Bajri”, është liruar sot nga Gjykata e rrethit Shkodër.

Prokuroria e këtij rrethi ka verifikuar se ai nuk ka kryer veprën penale të shitjeve të ndeshjeve për të cilën qëndronte me masën detyrim paraqitje prej disa muajsh.

Grima u arrestua në kuadër të operacionit “Volvo 4”, si anëtar i grupit “Bajri”, i dyshuar se ishte përfshirë në trukimin e ndeshjes së Kategorisë së Parë mes Vllaznisë B dhe skuadrës së Tërbunit të Pukës. Por këto akuza nuk janë provuar.

Dyshimet për këtë gjë e burgosën fillimisht, pastaj e lanë me masën “detyrim paraqitje” prej disa muajsh. Prej kësaj të marte, ai është qytetar i lirë dhe pa asnjë njollë mbi shpinë.