Oliver Kahn kritikon ashpër Gjermaninë: Problemi nuk është trajneri, por i gjithë sistemi

Legjenda e portës gjermane, Oliver Kahn, ka reaguar ashpër pas eliminimit të Gjermanisë nga Kupa e Botës 2026, duke theksuar se kriza e “Die Mannschaft” shkon shumë më thellë sesa emri i trajnerit.

Në një deklaratë të fortë, ish-portieri i kombëtares gjermane dhe i Bayern Munichut tha se dështimet e njëpasnjëshme në turnetë e mëdhenj tregojnë qartë se problemi nuk lidhet vetëm me stafin teknik.

“Tre trajnerë kanë dështuar në të njëjtën periudhë: Joachim Löw, Hansi Flick dhe Julian Nagelsmann. Nëse tre trajnerë dështojnë në të njëjtin vend, atëherë problemi është shumë më i thellë se vetë trajneri”, u shpreh Kahn.

Ai komentoi edhe momentin vendimtar të eliminimit ndaj Paraguajit, duke u ndalur te seria e goditjeve të penalltive.

“Ajo që më habiti më shumë ishte të shihja Joshua Kimmich duke kërkuar vullnetarë për të ekzekutuar penalltitë. Skuadrat e mëdha nuk kërkojnë vullnetarë në momente të tilla. Lojtarët duhet të marrin përgjegjësinë”, deklaroi ish-portieri.

Komentet e Kahn pasqyrojnë shqetësimin në rritje në Gjermani për të ardhmen e kombëtares, e cila vazhdon të zhgënjejë në kompeticionet madhore që prej triumfit në Kupën e Botës 2014.

Pas eliminimit të fundit, zërat për një reformim të thellë të futbollit gjerman janë shtuar ndjeshëm. Shumë figura të njohura të futbollit besojnë se problemet nuk mund të zgjidhen vetëm me ndërrimin e trajnerëve, por kërkojnë një analizë dhe riorganizim të plotë të sistemit të zhvillimit të futbollit në vend.