Oyarzabal mund të shkruajë sot historinë në finalen ndaj Argjentinës

Mikel Oyarzabal do të ketë një mundësi të artë për të hyrë në historinë e futbollit spanjoll në finalen e Kupës së Botës kundër Argjentinës. Sulmuesi i “La Roja”-s është vetëm një gol larg vendosjes së një rekordi të ri për kombëtaren e tij në një edicion të vetëm të Botërorit.

Aktualisht, Oyarzabal ka shënuar pesë gola në turne, duke barazuar arritjen e dy legjendave të futbollit spanjoll, David Villa, i cili realizoi pesë gola në Botërorin e vitit 2010, dhe Emilio Butragueño, që regjistroi të njëjtin numër golash në edicionin e vitit 1986 në Meksikë.

Nëse arrin të gjejë rrugën e rrjetës në finalen ndaj Argjentinës, 28-vjeçari do të bëhet golashënuesi më i mirë i Spanjës në një edicion të vetëm të Kupës së Botës, duke lënë pas dy emrat e mëdhenj të historisë së “La Roja”-s.

Oyarzabal ka qenë një nga futbollistët më të rëndësishëm të skuadrës spanjolle gjatë gjithë turneut, me golat dhe paraqitjet e tij vendimtare që kanë ndihmuar ekipin të sigurojë një vend në finalen e madhe.