Partizani barazim spektakolar ndaj Teutës, Vllaznia bën “paqe” me Dinamon

Në javën e 29-të të Abissnet Superiore, sfidat e zhvilluara të shtunën dhanë emocione dhe barazime që nuk ndryshuan renditjen kryesore. Në “Niko Dovana”, Teuta dhe Partizani u ndanë të barabartë 2-2 pas një ndeshjeje me katër gola dhe shumë skena të bukura.

Golin e parë e shënoi Xhuljano Skuka në minutën e 16, pas një krosi nga Valentino Murataj. Teuta barazoi në minutën e 36 me Vasilios Zogos, i cili shfrytëzoi një krosim nga këndi. Në pjesën e dytë, Zogos shënoi sërish për Teutën në minutën e 48, por Altin Bytyçi barazoi shifrat për Partizanin në minutën e 54, duke vulosur rezultatin final 2-2. Pas këtij barazimi, Partizani mbetet në vendin e 4-të me 44 pikë, ndërsa Teuta është në vendin e 6-të me 38 pikë.

Në “Loro Boriçi”, Vllaznia dhe Dinamo nuk shënuan gola, teksa sfida u mbyll 0-0. Një gol i Charles Bismark në minutën e 30 për Vllazninë u anulua nga VAR për pozicion jashtë loje, ndërsa kërkesa për penallti në minutën e 68 u refuzua nga arbitri, i cili ndëshkoi me karton të verdhë lojtarin e Vllaznisë për protesta. Pas këtyre rezultateve, Vllaznia Shkodër ruan kreun me 53 pikë, po aq sa Elbasani, ndërsa Dinamo City mbetet në vendin e 5-të me 40 pikë.