Perez fiton zgjedhjet te Reali, Mourinho gati të marrë drejtimin e madrilenëve

Sporti E Hënë, 8 Qershor 2026 09:01

Një video e publikuar në rrjetet sociale nga Jose Mourinho ka ndezur diskutimet në botën e futbollit. I pyetur nëse Florentino Perez i ka fituar zgjedhjet presidenciale te Real Madrid, tekniku portugez është përgjigjur shkurt: “Po, sigurisht”.

Pas votimit të zhvilluar dje, Real Madridi ka konfirmuar zyrtarisht Florentino Perezin në krye të klubit, duke hapur rrugën për realizimin e projekteve sportive të paralajmëruara gjatë fushatës së tij.

Sipas raportimeve, një nga vendimet më të rëndësishme pritet të jetë rikthimi i José Mourinhos në stolin e madrilenëve. Ndërkohë, në merkaton e verës janë parashikuar edhe përforcime të rëndësishme, me Denzel Dumfries që mund të transferohet nga Interi përmes klauzolës së lirimit, si dhe Ibrahima Konaté që shihet si një tjetër afrim i mundshëm për repartin defensiv.

Megjithatë, vëmendja më e madhe është përqendruar te “goditja” e radhës që Perez ka premtuar. Burime pranë klubit bëjnë të ditur se nesër mund të dërgohet një ofertë prej 150 milionë eurosh për një yll të futbollit europian.

Emri më i përfolur është ai i Michael Olise, por Bayern Munich ka bërë të qartë se lojtari nuk është në shitje, madje duke lënë të kuptohet se nuk do të largohej as për një ofertë prej 200 milionë eurosh. Për momentin, këto mbeten spekulime të merkatos dhe pritet që ditët në vijim të sjellin zhvillime të reja nga kampi madrilen.