Plas keq te Partizani, sulmuesi i shkon në shtëpi mbrojtësit rumun dhe konfrontohet fizikisht

Nuk kanë fund episodet te Partizani në prag të ndeshjes ndaj Tiranës. Gjatë javës, Boldor dhe Ferhati rezultuan pozitiv me koronavirus dhe u vetëkarantinuan menjëherë pas tamponit, edhe pse nuk shfaqën sindroma (ishin asimptomatikë).

Stërvitja e fundit përpara ndeshjes me Tiranën është anuluar dhe të gjithë kanë qenë në pritje të rezultatit. Edhe trajneri nuk ka folur përpara medieve, për të respektuar protokollin.

Por, dalja e përgjigjeve ka acaruar situatën dje rreth mesnate. Eraldo Çinari, një nga lojtarët e rezultuar pozitivë (bashkë me Kristi Kote dhe Esat Mala) me t’u njohur me rezultatin e tamponit i ka telefonuar Boldor, mbrojtësit rumun të Partizanit, duke e akuzuar si vatrën e infeksionit dhe pakujdesia e tij për të dalë në lokalet e natës, bashkë me të motrën.

Sulmuesi shkodran nuk ka nguruar t’i shkojë poshtë shtëpisë dhe të konfrontohet edhe fizikisht, aq sa e motra e Boldor ka nisur të bërtasë dhe ka tërhequr vëmendjen e banorëve të lagjes. Më pas ka ardhur edhe ambulanca, ndërsa shkodrani është larguar.