Pochettino: Mbappe mund të bëhet më i miri në botë, ndaj Barcelonës duhet kujdes!

Kylian Mbappe është tashmë ndër më të mirët në botë, por ylli i PSG ka potencialin të pasojë Lionel Messi dhe Cristiano Ronaldon. I këtij mendimi është Mauricio Pochettino. Strategu argjentinas ndërkohë u shpreh se lojtarët e tij duhet të kenë kujdes në sfidën e kthimit ndaj Barcelonës.

“Ai ka potencial për t’u bërë më i miri në botë. Kylian nuk i mungon asgjë, përveç kohës. Ne nuk mund ta përshpejtojmë procesin. Unë mendoj se Mbappe tashmë është ndër më të mirët në botë. Do të duhet kohë që ta plotësojë CV-në e tij, për të marrë njohjen që meriton. Jam i sigurt se do ta marrë kurorën e më të mirit.

Sfida e kthimit me Barcelonën? Në futboll, gjithçka është e mundur. Gjërat më të pabesueshme mund të ndodhin, pozitive dhe negative. Ndonjëherë, e paimagjinueshmja mund të ndodhë. Por, ne jemi pozitivë. E përgatisim çdo ndeshje në të njëjtën mënyrë, gjithmonë duke menduar se duhet të fitojmë edhe një herë tjetër për të shkuar në raundin tjetër”, deklaroi Pochettino.