Portieri i Kosovës, Muric pret penallti dhe ndal Juventusin në Torino

Në një mbrëmje ku pritej reagim, Juventus nuk shkoi më shumë se një barazim 1-1 përballë Sassuolo, në sfidën e javës së 30-të të Serie A, e zhvilluar në Allianz Stadium.

Bardhezinjtë e nisën sfidën me ritëm të lartë dhe gjetën avantazhin që në minutën e 14-të. Një aksion i ndërtuar nga portieri Mattia Perin u finalizua në mënyrë perfekte nga talenti Kenan Yildiz, i cili, pas asistit të Francisco Conceicao, dërgoi topin në rrjetë me një goditje të saktë nga jashtë zone.

Pjesa e parë u mbyll me epërsinë minimale të vendasve, por tabloja ndryshoi pas pushimit. Sassuolo reagoi shpejt dhe në minutën e 52-të rivendosi baraspeshën. Pas një aksioni model, Domenico Berardi shërbeu për Andrea Pinamonti, i cili nuk gaboi përballë portës.

Juventusi provoi të rikthehej në avantazh dhe në minutën e 73-të ishte shumë pranë golit të dytë, por tentativa e Jeremie Boga u ndal në mënyrë spektakolare nga portieri Arijanet Muric, protagonist absolut i sfidës.

Në pjesën e fundit të ndeshjes, trajneri Luciano Spalletti hodhi në fushë emra si Arkadiusz Milik dhe Dusan Vlahovic, të rikthyer pas mungesave të gjata, në kërkim të golit të fitores.

Rasti më i artë për vendasit erdhi në minutën e 86-të, kur një prekje me dorë e Jay Idzes solli penallti për Juventusin. Megjithatë, goditja e kapitenit Manuel Locatelli u prit pa vështirësi nga Muric, duke mbajtur në lojë miqtë.

Në minutat shtesë, portieri i Sassuolo-s u shndërrua sërish në hero, duke ndalur dy tentativa radhazi nga Milik dhe Vlahovic, për të vulosur një barazim që lë shije zhgënjimi në kampin bardhezi.