Portugalia arriti të fitojë në fushën e lojës edhe pa Cristiano Ronaldon, por mungesa e yllit 41-vjeçar dhe përplasja e krijuar së fundmi duket se kanë pasur pasoja edhe jashtë stadiumit.
Sipas raportimit të Mundo Deportivo, profili zyrtar i Kombëtares së Portugalisë në Instagram ka humbur rreth 2 milionë ndjekës pas vendimit të Ronaldos për të lënë grumbullimin e kombëtares dhe përplasjes që pasoi.
Para zhvillimeve të fundit, llogaria zyrtare e Portugalisë numëronte rreth 24.942.000 ndjekës, ndërsa aktualisht shifra ka zbritur në rreth 22,8 milionë. Një rënie e konsiderueshme që lidhet, sipas medias spanjolle, me reagimin e tifozëve të Cristiano Ronaldos në rrjetet sociale.
Situata mes kapitenit dhe përfaqësueses portugeze tashmë duket se po shkon drejt një tentative për pajtim. Trajneri Jorge Jesus ka deklaruar se Ronaldo e ka derën e hapur dhe mund të rikthehet në kombëtare kur të dëshirojë, ndërsa palët po përpiqen të gjejnë një mënyrë për të rikompozuar marrëdhënien.
Tifozët e CR7 kanë qenë veçanërisht aktivë në rrjetet sociale. Ditët e fundit, një tjetër episod kishte tërhequr vëmendjen, pasi profili i bashkëshortes së Gonçalo Ramos u vërshua nga reagime të shumta të mbështetësve të Ronaldos.
