PSG bën një ofertë të frikshme për Messin, trembet Barcelona

Paris Saint Germain tremb Barcelonën. Edhe kjo verë parashikohet shumë e nxehtë për klubin blaugrana pasi në lojë do të jetë sërish e ardhmja e Lionel Messit. Ylli argjentinas dukej shumë afër rinovimit me Barçën, ndryshe nga një vit më parë kur bëri kërkesë për t’u larguar, në drejtim të Messit ka mbërritur një ofertë e parezistueshme nga Paris Saint Germain e cila mund të tundojë 6-herë fituesin e Topit të Artë për të lënë Barcelonën.

Pavarësisht se ka lënë të kuptohet se do të rinovojë me katalanasit i bindur edhe nga projekti i presidentit të ri Joan Laporta, 33-vjeçari gjatë kësaj periudhe ka nguruar të hedhë firmën mbi kontratën e re, duke shtyrë gjithçka për në fund të sezonit, por kur të përfundojë kampionati gjërat mund të ndryshojë dhe ekzistojnë të gjitha mundësitë që Leo të zgjedhë largimin.

Nëse verën e kaluar favorit kryesor për të firmosur me argjentinasin ishte Manchester City këtë vit në pole qëndron Paris Saint Germain. Lajmin për një ofertë të parezistueshme të klubit parisien për Messin e ka zbuluar gazetari brazilian Marcelo Bechler i njëjti që ka bërë të ditur i pari kalimin e Neymar te PSG por edhe burofax-in që Messi i kërkonte largimin Barcelonës.