PSG në telashe të mëdha, 3 yje do të mungojnë kundër Barcelonës

Nuk ka zgjidhje për Paris Saint-Germain. Trajneri Luis Enrique do të duhet të bëjë pa Khvicha Kvaratskhelian në ndeshjen e nesërme (ora 21:00) ndaj Barcelonës, e vlefshme për javën e dytë të fazës së ligës në Champions League. Ylli gjeorgjian nuk është përfshirë në listën e të thirrurve, pasi pësoi një dëmtim të shtunën kundër Auxerre.

Kvaratskhelia u zëvendësua në pushimin e pjesës së parë, pasi u godit në pjesën e sipërme të kofshës nga Senaya, i cili u ndëshkua me karton të verdhë. Në vend të tij hyri Bradley Barcola, ndërsa ish-lojtari i Napolit u pa duke çaluar dhe duke diskutuar gjatë me stafin mjekësor të PSG-së. Kujtojmë se “Kvara” kishte pësuar një goditje edhe në tibinë e djathtë kundër Lensit në mes të shtatorit, por ishte rikuperuar për derbin ndaj Marsejës.

PSG do të ketë mungesë të rëndësishme me Kvaratskhelian, por rikuperon Vitinhan, i cili gjithashtu doli i dëmtuar në sfidën e fundit të Ligue 1, por tashmë është gati për Barcelonën. Joao Neves është rikthyer në grup pas dy ndeshjesh mungesë në kampionat. Në listën e mungesave mbeten edhe Ousmane Dembélé dhe Desire Doue, të cilët nuk janë ende gati për shkak dëmtimesh.