Pulisic flet hapur: “Më vjen keq, por duhet të shohim përpara”

Situata te Milani duket gjithnjë e më e tensionuar, duke krijuar përshtypjen e një klubi në prag ndryshimesh të mëdha dhe largimesh të rëndësishme. Pas lajmeve për lamtumirat e Luka Modrić dhe Rafael Leão, si dhe spekulimeve për një kalim të mundshëm të Adrien Rabiot te Napoli, edhe Christian Pulisic ka dhënë sinjale që kanë rritur shqetësimin te tifozët kuqezi.

Nga grumbullimi i kombëtares së Shteteve të Bashkuara, sulmuesi amerikan ka folur në prag të ndeshjes miqësore me Senegalit, duke bërë një analizë të sezonit të fundit me Milanin. Ai e ka cilësuar këtë periudhë si të vështirë si për skuadrën, ashtu edhe për veten e tij, duke pranuar se ka pasur momente ku mund të kishte bërë më shumë në fushë. Pulisic theksoi se nuk kërkon të fajësojë askënd për situatën, por e sheh këtë si një fazë që duhet lënë pas, duke shprehur keqardhje për rezultatet dhe duke u fokusuar te e ardhmja.

Megjithatë, deklarata e tij se “duhet të shoh përpara” ka ngjallur pasiguri në ambientin kuqezi, sidomos në një moment kur klubi po kalon një periudhë të paqartë në drejtim dhe në projektin sportiv. Milani po përballet njëkohësisht me kërkimin për trajnerin e ri dhe drejtorin sportiv, duke e bërë situatën edhe më të ndërlikuar.

Në horizont për Pulisic qëndron edhe Botërori me SHBA-në nën drejtimin e Mauricio Pochettino-s, ndërsa paralelisht pritet edhe merkatoja e verës. Pikërisht në këtë kontekst, e ardhmja e tij në Milano mbetet e pasigurt, veçanërisht pasi kontrata i skadon në qershor të vitit 2026 dhe bisedimet për rinovim nuk kanë avancuar për shkak të kërkesave të lojtarit.

Nga ana e drejtuesve të Milanit dhe grupit RedBird, Pulisic konsiderohet një element i rëndësishëm si në aspektin sportiv ashtu edhe në atë ekonomik, ndaj synimi është ta mbajnë në skuadër. Megjithatë, situata aktuale dhe mungesa e një marrëveshjeje të re e lënë të hapur mundësinë e një largimi të tij në të ardhmen.