Reali fiton trofeun miqësor në Kinë ndaj Milan, por me 11-metërsha

Reali i Madridit koleksionon trofeun e dytë veror duke arritur suksesin vetëm nga 11-metërshat, pas mbylljes së ndeshjes pa gola kundër Milan. Spanjollët dhe kuqezinjtë u ndeshën në Kinë për sfidën kupa “International Champions Cup të Azisë”, pas sukseseve që kishin arritur në sfidat me Interin, por ishin Los Blancos ata që triumfuan në të nxehtin e Shanghait me rezultatin final 10-9 pasi ishte portieri kuqezi, Donnarumma ai që gaboi në tentativën e fundit për të kaluar kolegun Casilla, i cili arriti të priste goditjen qëndrore. Ndeshja nisi me një ritëm të lartë me Milan  që dha shkëndijat e para, ndërsa skuadra e Benitez reagoi me një të majtë të dobët të Cristiano Ronaldos në minutën e 21-të.

Ishte Niang ai që ngjalli disa herë panik në mbrojtjen merengues por pa arritur të zhbllokonte rezultatin. Në të 57-ën, Diego Lopez devijoi goditjen me kokë të Ronaldos, ndërsa 4 minuta më pas Bacca nuk arriti të kalonte gardianin spanjoll. Ishte sërish kolumbiani që në bashkëpunim me Luiz Adrianon 8 minuta nga fundi rrezikuan sërish. Kaq mjaftoi për një 90 minutësh me shumë raste por pa gola dhe skuadrat iu drejtuan 11-metërshave ku fillimisht gabuan Bacca e Kroos dhe në ekzekutimin e 22-të, portieri i tretë i Milanit, Donnarumma mbylli sfidën me një të djathtë të lehtë. Reali i Madridit kthehet në shtëpi me një tjetër trofe që mbi të gjitha shërben për të mbajtur lart moralin në prag të një sezoni të gjatë.