Reali mund Bilbaon dhe marshon drejt titullit, Ramos sërish vendimtar (VIDEO)

Real Madrid është më pranë se kurrë titullit kampion në La Liga. Skuadra e Zidane fitoi 1-0 edhe në transfertën e “San Mame”-s ndaj Athletic Bilbaos, duke shkuar në 7 pikë larg nga vendi i dytë që mbahet nga Barcelona.

Benzema dhe Inaki Williams dhanë dy sinjalet e para në portat respektive në minutat e para. Në minutën e 17-të, Raul Garcia detyron Thibaut Coutois që të bëjë një pritje spektakolare për të shpëtuar ekipin e tij.

Momenti vendimtar i ndeshjes ishte minuta e 71-të, teksa Marcelo u shkel brenda zonës nga një mbrojtës, teksa arbitri i ndihmuar edhe me VAR akordoi 11-metërsh. Nga pika e bardhë “specialisti” Sergio Ramos nuk e pati të vështirë për ta dërguar “sferën” brenda kuadratit.

Deri në fundin e ndeshjes skuadra madrilene administroi mjaft mirë rezultatin duke marrë një sukses vendimtar në luftën për titullin kampion. Me 4 javë nga fundi, ekipi i Zidane ka një avantazh të madh ndaj Barcelonës. /R.Lika-Koha Jone/