Nëse kjo ishte vërtet ndeshja e fundit e Guillermo Ochoas me fanellën e Meksikës, atëherë portieri legjendar nuk mund të kishte kërkuar një mbyllje më të bukur të karrierës së tij ndërkombëtare.
40-vjeçari, i cili ka marrë pjesë në gjashtë Kupa Bote, duke ndarë këtë rekord me Lionel Messin dhe Cristiano Ronaldon, zbriti në fushë në sfidën e fundit të fazës së grupeve ndaj Republikës Çeke.
Ochoa u aktivizua në minutën e 78-të në vend të portierit titullar Rangel dhe u prit me duartrokitje të zjarrta nga tifozët në stadiumin “Azteca”. Publiku meksikan i rezervoi një ovacion të veçantë njërit prej futbollistëve më të dashur të kombëtares, në atë që mund të ketë qenë paraqitja e tij e fundit me fanellën verdhejeshile.
Veterani kontribuoi në ruajtjen e portës së paprekur deri në fund të takimit, ndërsa Meksika triumfoi me rezultatin 3-0 ndaj çekëve, duke e mbyllur grupin me pikë të plota dhe duke konfirmuar formën e shkëlqyer në këtë Botëror. Pas ndeshjes, Ochoa nuk i fshehu emocionet.
“Gjithçka shkoi në mënyrën më të mirë të mundshme. Skenari ishte shkruar në mënyrë perfekte. Falënderoj tifozët për dashurinë që më kanë treguar gjithmonë, brenda dhe jashtë fushës. Po ashtu falënderoj shokët e skuadrës, familjen time dhe stafin teknik që ma dhanë këtë mundësi”, deklaroi i emocionuar ish-portieri i Salernitanës.
Pavarësisht nëse kjo do të rezultojë apo jo ndeshja e tij e fundit me kombëtaren, Guillermo Ochoa largohet si një nga figurat më emblematike në historinë e futbollit meksikan, duke lënë pas një trashëgimi që do të kujtohet gjatë nga tifozët e “El Tri”.