Rivaliteti: Ronaldo dy gola për Realin, Leo Messi tripletë me Barçën

Sporti E Hënë, 19 Prill 2021 03:23

Lionel Messi shënoi tripletën e tij të 22-të në La Liga për Barcelonën, në fitoren 4-0 që katalanasit arritën në ndeshjen e javës së fundit ndaj Deportivo La Korunjës. Asi Argjentinas që humbi betejën për Topin e Artë, me Cristiano Ronaldo, shënoi tre nga katër golat e fitores së fundit, një prej të cilëve me kokë, ndonëse të tilla goditje nuk janë specialiteti i tij. Barça dhuroi spektakël në “Estadio Riazor” dhe mbetet në vend të dytë, në ndjekje të Realit, me vetëm një pikë. Messi hapi serinë e golave në ’11, pas një asi të Rakitiç dhe goditi nga larg, për të gjetur rrugën e rrjetës. Ai dyfishoi shifrat 18 minuta më vonë, me një goditje të bukur me kokë, teksa u gjend i lirë në zonën e Deportivos. Por 27-vjeçari ishte i pandalshëm edhe në pjesën e dytë, kur realizoi golin e tretë personal të kësaj ndeshje, falë një goditje të saktë me të majtën, në brendësi të zonës. Mbrojtësi i Deportivos, Sidnei shënoi një gol në portën e vet dhe vulosi rezultatin e këtij takimi, në 4-0. Real Madrid fitoi 3-0 në fushë të Getafes, me dy gola të Ronaldos dhe mban kryesimin e La Liga. Pas ndeshjes, trajneri Luis Enrique u shpreh i kënaqur me rikthimin e Messi, performancën e të cilit e cilësoi si më të mirën e këtij viti. – “ Ai ka luajtur në një nivel fenomenal gjatë gjithë sezonit,”- theksoi trajneri. – “Messi nuk ka rënë ndonjëherë nga nivelet e larta, por përkundrazi, po shfaqet edhe më vendimtar,” – theksoi Enrique, në një kohë kur mediat spekulojnë se mes tij dhe një nga dy lojtarët më të mirë në botë ka pasur mosmarrëveshje.