“Rolex” për Brojën? Premtimi i çmendur i Guardiolës nëse Burnley ndal Arsenalin

Gara për titullin në Premier League ka hyrë në një fazë dramatike, ku çdo ndeshje po merr peshë vendimtare dhe surprizat nuk mungojnë. Në qendër të vëmendjes është edhe sulmuesi i kombëtares shqiptare Armando Broja, i cili pritet të jetë protagonist në sfidën e radhës.

Skuadra e tij, Burnley, ndonëse ka humbur matematikisht qëndrimin në elitë, pritet të zbresë në fushë me motivim maksimal në përballjen ndaj kryesuesve të Arsenal në “Emirates Stadium”. Ndeshja e së hënës shihet si vendimtare për fatin e kampionatit.

Situata është ndezur edhe më shumë pas deklaratave të trajnerit të Manchester City, Pep Guardiola, i cili pas fitores së fundit të skuadrës së tij ka bërë një premtim që ka bërë jehonë në mediat britanike.

“Nëse Burnley mposht Arsenalin të hënën, do t’u blej nga një orë ‘Rolex’ secilit futbollist të tyre,” deklaroi Guardiola.

Ky zotim ka shtuar presionin dhe kuriozitetin për sfidën, ku Burnley pritet të kërkojë surprizën e madhe pavarësisht sezonit të vështirë dhe rënies nga kategoria.

Broja pritet të udhëheqë sulmin e skuadrës së tij në këtë ndeshje të rëndësishme, duke u kthyer në një nga emrat më të ndjekur të takimit. Përballja ndaj Arsenalit mund të ketë ndikim të drejtpërdrejtë në garën për titull, ndërsa Manchester City shpreson për një hap të gabuar të rivalëve të tyre.

Nëse Burnley arrin të ndalë Arsenal-in, jo vetëm që do të ndryshonte rrjedhën e kampionatit, por do të sillte edhe një nga historitë më të çuditshme të sezonit në futbollin anglez.