“Teatri i Ëndrrave” është kthyer në “Teatrin e Maktheve” për Romën. Skuadra italiane pësoi një tjetër humbje të dhimbshme në Champions League, duke shpërdoruar avantazhin 2-0 ndaj Manchester United dhe duke u larguar nga “Old Trafford” me një humbje 3-2.
Problemi për verdhekuqtë nuk është më thjesht një humbje e izoluar. Përmbysjet po kthehen në një fenomen shqetësues, që rrezikon të shndërrohet në një sindromë të vërtetë për skuadrën e drejtuar nga Gian Piero Gasperini.
Roma tregoi dy fytyra krejtësisht të ndryshme. Në pjesën e parë ishte bindëse, agresive dhe dominuese. Avantazhi 2-0 madje dukej i pamjaftueshëm, pasi Donyell Malen dhe Matías Soulé patën mundësi të mira për të shënuar edhe golin e tretë.
Manchester United vuajti përballë lojës së italianëve, aq sa goditjen e parë drejt portës, ndonëse të pasaktë, e regjistroi vetëm pas 26 minutash lojë, me Balebën.
Por gjithçka ndryshoi pas pushimit.
Zëvendësimi i Pisillit me Morën, që në retrospektivë mund të konsiderohet një vendim jo fort i goditur, ishte vetëm fillimi i problemeve. Që në sekondat e para të pjesës së dytë, Baleba rrezikoi seriozisht portën e Romës pas një aksioni individual, por një dëmtim muskulor i tij i shpëtoi verdhekuqtë nga një situatë e rrezikshme.
Më pas erdhi episodi i penalltisë, duke rikthyer frikën e një tjetër përmbysjeje, ashtu siç kishte ndodhur në përballjen me Real Madridin.
Gabimet individuale rezultuan vendimtare. Balerdi, i cili deri në atë moment kishte zhvilluar një ndeshje shumë të mirë dhe ishte ndër lojtarët më të spikatur së bashku me Soulén në pjesën e parë, bëri një gabim të rëndë duke i dhuruar Cunhas mundësinë për të shënuar golin e barazimit.
Makthi u kompletua në fund, kur Manchester United realizoi golin e tretë. Në këtë aksion, Balerdi mbajti në lojë Lacey-n dhe më pas nuk arriti të ndalonte Cunhan, i cili vulosi përmbysjen e anglezëve.
Statistikat janë shqetësuese. Në katër ndeshje të zhvilluara në Champions League, Roma ka përjetuar tri raste ku nuk ka arritur të ruajë avantazhin në rezultat. Gjithçka nisi në Stamboll, në barazimin 1-1 ndaj Fenerbahçes, ku skuadra turke barazoi në fillim të pjesës së dytë golin e shënuar nga Cristante.
Më pas erdhi katastrofa në “Olimpico”. Roma kryesonte 3-1, por pësoi tri gola në tetë minutat e fundit, të gjitha pas goditjeve nga këndi, duke pësuar një humbje të pabesueshme.
Tashmë, në “Old Trafford”, historia u përsërit. Roma nuk arriti të kontrollonte lojën në pjesën e dytë dhe u ndëshkua nga gabimet individuale. Mancini shkaktoi penalltinë, ndërsa Balerdi bëri një gabim të rëndë që i dha mundësinë Cunhas të barazonte rezultatin në 2-2.
Pas katër ndeshjeve, skuadra e Gasperinit ka grumbulluar vetëm katër pikë në Champions League. Një shifër që mund të ishte krejtësisht ndryshe nëse ndeshjet do të përfundonin pas 45 minutash.
Në një skenar të tillë, Roma do të kishte dhjetë pikë: fitore në Turqi, barazim ndaj Real Madridit dhe triumfe kundër Slovanit dhe Manchester Unitedit.
Por futbolli nuk njeh rezultate hipotetike dhe pikët e humbura nuk mund të rikthehen. Tashmë, Roma duhet të përqendrohet te kampionati, ku e presin dy përballje që në letër konsiderohen të përballueshme: ndaj Sassuolos në shtëpi dhe Parmës në transfertë.
Më pas, më 25 nëntor, verdhekuqtë do të rikthehen në skenën europiane për një transfertë shumë të vështirë në Paris, përballë PSG-së.
Shpresa e Gasperinit është që deri atëherë të rikthehen edhe disa prej lojtarëve të rëndësishëm që mungojnë për shkak dëmtimesh. Svilar, Koné dhe Dybala janë tre emra që mund t’i japin më shumë alternativa skuadrës.