Roma përballet sërish me problemet pas pushimit, shqetësim te verdhekuqtë

Roma zhvilloi një paraqitje të mirë në sfidën e së shtunës ndaj Interit, duke lënë pak hapësirë për kritika. Megjithatë, situata ndryshoi menjëherë pas pushimit, kur Lautaro Martinez shënoi për zikaltërit dhe i dha ekipit të tij besim për të reaguar. Interi më pas arriti të rikthehej në lojë dhe takimi përfundoi në barazim 2-2.

Goli i pësuar në fillim të pjesës së dytë riktheu në vëmendje një problem që Roma e ka shfaqur edhe më herët. Bëhet fjalë për vështirësinë e skuadrës për të ruajtur përqendrimin në minutat e para pas pushimit.

Edhe më parë, verdhekuqtë kanë pësuar gola në këtë periudhë, si në rastin e golit të Broën në Champions League dhe atij të Edersonit në ndeshjen ndaj Atalantës.

Trajneri Gian Piero Gasperini e ka evidentuar këtë problem pas ndeshjes me Interin, duke theksuar se tre gola të pësuar në pesë minutat e para të pjesës së dytë nuk mund të konsiderohen thjesht rastësi. Sipas tij, në rastin e fundit skuadra gaboi për shkak të mungesës së përqendrimit.

Statistikat e sezonit të kaluar e përforcojnë këtë shqetësim. Në Serie A, Roma pësoi 8 nga 28 golat e saj në 15 minutat e para të pjesës së dytë, që përbën rreth 28.5% të totalit. Në këtë statistikë përfshihen edhe golat e pësuar nga Lautaro dhe Thuram ndaj Interit, si dhe ai i Strefezzës në transfertën ndaj Parmës.

Nëse përfshihet edhe Europa League, shifra bëhet edhe më domethënëse, pasi 4 nga 11 golat e pësuar në këtë kompeticion erdhën gjatë së njëjtës periudhë të ndeshjes.

Të dhënat tregojnë një problem të përsëritur të Romës për të ruajtur intensitetin dhe përqendrimin pas pushimit. Gasperini dhe stafi i tij teknik do të duhet të punojnë për ta korrigjuar këtë dobësi, nëse skuadra dëshiron të vazhdojë objektivin për titullin në Serie A.