Roma triumfon ndaj Stuttgartit, vendos Pisilli me dopietë

Roma vazhdon momentin e saj pozitiv në Europa League dhe korr fitoren e katërt radhazi, duke mposhtur Stuttgartin 2-0 në Olimpico. Protagonist absolut i mbrëmjes ishte mesfushori i ri Niccolò Pisilli, i cili vendosi ndeshjen me një dopietë vendimtare.

Verdhekuqtë u shfaqën të organizuar dhe cinikë, duke rrezikuar shumë pak përballë gjermanëve. Goli i parë erdhi në minutën e 40-të, kur Pisilli, pas një asistimi nga Soulé, u fut në zonë dhe mposhti portierin Nübel me një goditje të fortë. Stuttgart provoi të reagojë, por u përplas disa herë me pritjet vendimtare të Svilar.

Në fund, pas aktivizimit të Dybala-s dhe Mancinit, Roma vulosi rezultatin me golin e dytë sërish nga Pisilli në minutën e 92-të. Me këtë sukses, Roma ngjitet në vendin e gjashtë me 15 pikë dhe sheh nga afër kualifikimin direkt në fazën e 1/8-ve, ndërsa Stuttgart zbret në vendin e 12-të.