Cristiano Ronaldo vazhdon të shkruajë histori në futbollin botëror. Ylli portugez ka hedhur një tjetër hap drejt një prej rekordeve më të jashtëzakonshme të karrierës së tij, atë të 1000 golave zyrtarë, pasi realizoi një tripletë në fitoren 5-3 të Al-Nassr ndaj Al Kholood, në kampionatin saudit.
Në moshën 41-vjeçare, Ronaldo tregoi edhe një herë se mbetet një makinë golashënimi. Sulmuesit portugez iu deshën vetëm 15 minuta në pjesën e dytë për të realizuar tre gola, duke gjetur rrugën e rrjetës në minutat 66, 72 dhe 81. Madje, CR7 kishte mundësinë ta përfundonte takimin me pesë gola, por dy realizime të tjera iu anuluan.
Me këtë tripletë, Ronaldo e çoi në 985 numrin e golave zyrtarë në karrierë me klubet dhe kombëtaren portugeze. Kështu, atij i duhen edhe vetëm 15 realizime për të prekur shifrën historike prej 1000 golash, një objektiv që e ka përmendur hapur prej vitesh.
Golat e tij janë shpërndarë në gjashtë skuadra: 450 me Real Madridin, 146 me Portugalinë, 145 me Manchester United, 138 me Al-Nassr, 101 me Juventusin dhe 5 me Sporting Lisbonën. Ndërkohë, rivali i tij i madh, Lionel Messi, numëron 936 gola në karrierë, duke qenë ndjekësi më i afërt aktiv i portugezit.
Ronaldo ka pasur gjithashtu një periudhë të suksesshme në Arabinë Saudite, ku ka fituar dy herë radhazi Këpucën e Artë të kampionatit, në sezonet 2023/24 dhe 2024/25. Me 985 gola në llogari, legjenda portugeze është vetëm 15 hapa larg një rekordi që mund të hyjë përgjithmonë në historinë e futbollit.