Sabah shkruan historinë në Champions League, klub i themeluar në vitin 2017

Sabah ka realizuar një nga surprizat më të mëdha të futbollit europian. Klubi nga Azerbajxhani, i themeluar vetëm në vitin 2017, ka siguruar një vend në fazën e ligës së Champions League, pasi eliminoi Hapoel Beer Sheva në një përballje spektakolare.

Pas humbjes 2-1 në ndeshjen e parë, Sabah reagoi në mënyrë të jashtëzakonshme në sfidën e kthimit, duke triumfuar 5-2 pas kohës shtesë dhe duke siguruar kualifikimin në elitën e futbollit europian.

Klubi nga qyteti i Masazirit është një shembull i rritjes së shpejtë. I krijuar vetëm nëntë vite më parë, Sabah ka arritur brenda një kohe shumë të shkurtër të sfidojë dominimin e Qarabagut në futbollin vendas.

Në sezonin 2025/26, Sabah fitoi për herë të parë titullin kampion në Azerbajxhan. Një vit më parë, klubi kishte mposhtur pikërisht Qarabagun në finalen e Kupës së Azerbajxhanit, duke siguruar pjesëmarrjen në Europa League.

Historia e Sabah ka edhe një lidhje interesante me Italinë. Në stafin teknik të skuadrës është Valerio Zuddas, i cili mban postin e zëvendës-trajnerit. I lindur në Romë në vitin 1989, Zuddas është krahu i djathtë i trajnerit Valdas Dambrauskas dhe e mban këtë detyrë që prej qershorit 2025.

Përpara aventurës në Azerbajxhan, italiani ka pasur eksperienca në disa kampionate europiane, duke punuar me klube si Diósgyőri, Partizan Beograd, Sheriff Tiraspol, Hibernian, Hajduk Split, Pafos, Honved dhe UTA Arad.

Tashmë, Zuddas është pjesë e një kapitulli historik të Sabahut, që për herë të parë do të përballet me klubet më të mëdha të Europës në skenën e Champions League.