Salah dëmtohet dhe nuk do të luajë më me Liverpoolin këtë sezon

Mohamed Salah nuk do të luajë më këtë sezon për Liverpoolin. Sulmuesi egjiptian pësoi një dëmtim në tendinën e kofshës gjatë fitores 3-1 të “Reds” kundër Crystal Palace në Premier League. Sipas Ibrahim Hassan, drejtorit të kombëtares së Egjiptit, Salah do të jetë jashtë fushave për katër javë. Anësori 33-vjeçar u detyrua të largohej nga loja në minutën e 60-të dhe përshëndeti tifozët rrugës për në dhomat e zhveshjes.

Liverpooli ende nuk ka bërë asnjë njoftim zyrtar mbi gjendjen fizike të Salah. Megjithatë, Hassan ishte i qartë në deklaratën e tij për Reuters, duke theksuar se egjiptiani ka luajtur tashmë ndeshjen e tij të fundit me “Reds” për këtë sezon. “Ai ka pësuar një këputje në tendinën e kofshës dhe do t’i duhen katër javë trajtim,” shpjegoi drejtori i kombëtares egjiptiane, duke konfirmuar kështu fundin e parakohshëm të sezonit për yllin e tyre.

Ky dëmtim vjen në fazën finale të qëndrimit të Salah në Anfield. Sulmuesi tashmë kishte njoftuar se do të largohej nga kampionët aktualë të Premier League në fund të sezonit. Pas nëntë sezonesh të mbushura me tituj dhe suksese, lamtumira e tij do të jetë më shumë me fjalë sesa me gola në fushë. Ai pritet t’u drejtohet tifozëve pas ndeshjes së fundit të sezonit, kundër Brentfordit, për të dhënë mesazhin e tij të fundit si lojtar i Liverpoolit.

Në Egjipt nuk ka panik në lidhje me Kupën e Botës. Hassan siguroi se Salah do të jetë në gjendje të mirë fizike për turneun që do të zhvillohet në Shtetet e Bashkuara, Meksikë dhe Kanada, i cili nis më 11 qershor. Kombëtarja egjiptiane do të ndajë Grupin G me Belgjikën, Zelandën e Re dhe Iranin. Salah dëshiron të rikuperohet në kohë dhe të shmangë përsëritjen e skenarit të vitit 2018, kur ai pësoi një dëmtim në shpatull në humbjen 3-1 kundër Real Madridit në finalen e Ligës së Kampionëve. Atëherë ai mbërriti i dëmtuar në Rusi, shënoi dy gola në dy ndeshje, por Egjipti u eliminua në fazën e grupeve.

Liverpoolit i kanë mbetur ende dy ndeshje në shtëpi, kundër Chelseat më 9 maj dhe kundër Brentfordit më 24 maj. Para kësaj, ata do të vizitojnë Manchester United më 3 maj, një rival të cilin Salah e ka ndëshkuar shpesh, dhe gjithashtu do të luajnë jashtë fushe kundër Aston Villas më 17 maj. Egjiptiani, golashënuesi i tretë më i mirë në historinë e Liverpoolit, e mbyll kështu sezonin e tij me 12 gola dhe nëntë asistime në të gjitha garat, duke lënë një boshllëk të madh në sulmin e skuadrës.

Marrë nga Marca Premier