Seedorf zbulon pse zgjodhi Interin para Manchester United, arsyeja e parë është … Ronaldo

Clarence Seedorf ka rrëfyer një nga zgjedhjet më të rëndësishme të karrierës së tij, duke zbuluar arsyen pse vendosi të transferohej te Interi, pavarësisht interesimit të Manchester United.

Ish-mesfushori holandez foli në një intervistë me Rio Ferdinand, të publikuar në kanalin YouTube të ish-mbrojtësit anglez dhe të ribotuar nga faqja zyrtare e Manchester United.

Seedorf tregoi se pas eksperiencave në Spanjë, Premier League ishte një nga destinacionet që e tërhiqte më shumë, por në fund zgjodhi Interin.

“Spanja dhe Italia ishin vendet ku duhej të shkoja. Më pas Premier League u rrit shumë dhe lojtarët më të mirë filluan të shkonin atje. Arsenali dhe Manchester United më ndoqën kur u transferova nga Sampdoria te Real Madridi. Pas Real Madridit, e njëjta gjë ndodhi përsëri, por unë shkova te Interi”, rrëfeu Seedorf.

Kur u pyet pse zgjodhi klubin zikaltër, përgjigjja e tij ishte e menjëhershme: “Ronaldo! Fenomeni që luante te Interi, a mjafton kjo?”

Holandezi tregoi gjithashtu se një rol të rëndësishëm pati edhe trajneri Marcello Lippi.

“Lippi më telefonoi dhe më tha se donte që unë të luaja pas Christian Vierit dhe Ronaldos. Dhe unë pyeta: ‘Kur dhe ku?’”, tha ish-mesfushori.

Seedorf pranoi se Manchester United ishte një klub që e admironte që në fëmijëri, pasi ishte rritur duke ndjekur Premier League.

“Mendoj se nëse ka një klub në Angli për të cilin do të doja të luaja, ai ishte Manchester United. Liverpooli dhe Arsenali janë klube ikonike, por United ishte ai që më tërhiqte më shumë”, u shpreh ai.