
Xherdan Shaqiri vazhdon të shkëlqejë në Zvicër, duke treguar se klasi nuk humbet kurrë. Sulmuesi me origjinë shqiptare ishte protagonist absolut në fitoren bindëse të Basel-it 4-0 ndaj Zurich, duke realizuar dy gola të mrekullueshëm që vendosën fatin e sfidës.
33-vjeçari tregoi edhe një herë pse është një nga emrat më të spikatur të futbollit helvetik. Me dopietën e radhës, Shaqiri arrin kuotën e 13 golave këtë sezon në Superligën Zvicerane, ndërkohë që ka dhënë gjithashtu 14 asistime në 28 ndeshje të zhvilluara.
Pas aventurave në elitën e futbollit europian me skuadra si Bayern Munich, Inter, Stoke City, Liverpool, Lyon dhe së fundmi në MLS me Chicago Fire, rikthimi në atdhe duket se i ka dhënë një frymë të re karrierës së Shaqirit.