Shqipëria kërkon mrekullinë në Leskovac, sfidon Serbinë mes masave ekstreme të sigurisë

Kryesore Sporti E Shtunë, 11 Tetor 2025 18:14

Sfida këtë mbrëmje në Leskovac me masa ekstreme sigurie mes Serbisë dhe Shqipërisë, nuk është veç për trofe apo pikë, por është për kontekst, identitet dhe simbolikën kombëtare. Loja është me rëndësi për kualifikueset për në Kupën e Botës 2026.

Sfida luhet në orën 20:45, në stadiumin e Leskovacit, shumë pranë kufirit me Kosovën. Shqipëria renditet e dyta me 8 pikë në grupin K, ndërsa Serbia e treta me 7 pikë, por rivalët ballkanas kanë një ndeshje më pak se kuqezinjtë. Ndeshja pritet që të luhet në kushte të rrepta sigurie, teksa nuk ka pasur bileta në treg, nga frika e huliganëve serb që në ndeshjet e fundit kanë shkaktuar shumë probleme. Ndërsa vlen të theksohet se në këtë ndeshje do të mungojnë tifozët shqiptar.

Formacioni i Shqipërisë:

Me uniformën e bardhë do përballet sot Shqipëria kundër Serbisë në Leskovac. Duke qenë udhëtues dhe me serbët vendas që kanë uniformën e parë të kuqe, tanët janë detyruar të luajnë me fanellën e dytë. Federata Shqiptare e Futbollit ka publikuar edhe formacionin kuqezi. Në portë do të jetë Strakosha. Mbrojtja do të përbëhet nga Hysaj, ajeti, Gjimshiti dhe Mitaj. Në mesfushë është treshja Asllani, Laçi dhe Shehu. Ndryshimi i vetëm vjen nga krahu i majtë i sulmit, aty ku nuk do të jetë as Bajrami dhe as Hoxha, por Myrto Uzuni, ndërsa krahu i djathtë i është besuar Brojës. Në majën e sulmit do të jetë sërish Manaj.