Juventusi po kalon një periudhë të vështirë, ndërsa pavarësisht rezultateve zhgënjyese, drejtuesit kanë vendosur t’i japin edhe një mundësi Luciano Spallettit. Megjithatë, e ardhmja e trajnerit italian mbetet e lidhur ngushtë me rezultatet e ndeshjeve të ardhshme, ndërsa emri i Antonio Contes vazhdon të përmendet si një alternativë e mundshme.
Pas humbjeve ndaj Lazios dhe Genoas, drejtuesit kanë kërkuar reagim nga futbollistët. Carnevali ka zhvilluar një takim me skuadrën në Continassa, ndërsa më pas klubi vendosi që lojtarët të qëndrojnë në grumbullim deri në përballjen me Napolin.
Por problemet duket se janë edhe më të thella. Sipas gazetës “La Stampa”, në dhomat e zhveshjes kanë nisur të shfaqen pakënaqësi për metodat e punës së Spallettit. Mesazhi që përcillet nga grupi është domethënës: “Shumë fjalë dhe pak stërvitje të vërtetë”.
Edhe “Tuttosport” raporton se disa lojtarë mendojnë se nuk janë përgatitur mjaftueshëm fizikisht. Sipas gazetës, salla e masazheve është vazhdimisht e mbushur, ndërsa palestra ka shumë hapësira të lira.
Ndërkohë, gjatë kontrolleve të fundit mjekësore, stafi i kushtoi rëndësi të veçantë edhe peshës trupore të futbollistëve. Megjithatë, të gjithë rezultuan brenda parametrave të kërkuar.