
Enzo Fernandes kërkoi falje për termat ofendues që përdori ndaj lojtarëve të Francës, disa prej të cilëve, shokë skuadre me të te Chelsea. Këta të fundit reaguan duke e fshirë nga kontaktet e tyre në rrjetet sociale.
Mesfushori argjentinas u fut “live” në Instagram pas fitores në finalen e Kupës së Amerikës kundër Kolumbisë, duke kënduar një këngë ku ngacmohej Franca, skuadra të cilën Argjentina mundi në finalen e Botërorit 2022.
Në tekstin e këngës përmendej që lojtarët e Francës vetëm pasaportat kanë franceze, pasi të gjithë janë me origjinë nga Afrika. 23-vjeçari kërkoi falje pas reagimeve të shumta që pati pas publikimit të videos.
Në një postim në Instagram Story, Fernandez tha: “Dua të kërkoj sinqerisht falje për videon e postuar në kanalin tim në Instagram. Kënga përfshin gjuhë tepër ofenduese dhe nuk ka justifikim për ato fjalë”.
