Barazimi 0-0 mes Australisë dhe Paraguait në Grupin D të Botërorit 2026 ka shkaktuar reagime të ashpra në rrjetet sociale, me shumë tifozë që kanë akuzuar të dyja skuadrat se luajtën qëllimisht për rezultatin që i favorizonte të dyja.
Para nisjes së takimit, situata në grup ishte e qartë: një barazim do t’i çonte të dy ekipet në kuotën e katër pikëve, pas fitueses së grupit, SHBA-së, duke i afruar ndjeshëm me fazën me eliminim direkt.
Dhe pikërisht kështu ndodhi. Në stadiumin e San Franciskos, ndeshja përfundoi 0-0, në një sfidë me pak raste dhe ritëm të ulët, rezultat që i siguroi Australisë vendin e dytë në grup, ndërsa Paraguait vendin e tretë, me gjasa shumë të mëdha për t’u kualifikuar si një nga ekipet më të mira të vendeve të treta.
Menjëherë pas përfundimit të takimit, rrjetet sociale u mbushën me komente kritike. “Ndoshta ndeshja më e keqe në historinë e Botërorëve dhe ndoshta në historinë e njerëzimit”, shkroi një tifoz.
Një tjetër ngriti dyshime për një marrëveshje të heshtur mes skuadrave, ndërsa shumë përdorues vunë në dukje se rezultati 0-0 ishte i parashikueshëm, pasi u garantonte të dyja ekipeve përfitime në renditje.
Me këtë rezultat, Australia siguroi vendin e dytë në Grupin D dhe do të luajë në fazën e 1/16-ave më 3 korrik në Arlington të Teksasit, kundër skuadrës që do të përfundojë e dyta në Grupin G.
Paraguai, ndërkohë, duhet të presë për konfirmimin matematikor të kualifikimit, por pozicioni i tij në renditjen e vendeve të treta konsiderohet shumë i favorshëm.
Rezultati ka ndikuar edhe te kombëtaret e tjera që shpresojnë të kalojnë si të treta. Veçanërisht, shanset e Skocisë janë komplikuar, pasi Paraguai ka siguruar një renditje më të lartë në klasifikimin e skuadrave të vendeve të treta.
