Ole Gunnar Solskjaer ka dalë në mbështetje të Michael Carrick, në një moment delikat për trajnerin e Manchester United. Legjenda e “Djajve të Kuq” beson se ish-shoku i tij ka të gjitha cilësitë për të përmbysur situatën në “Old Trafford”, pavarësisht rezultateve negative dhe presionit në rritje.
Në një deklaratë për televizionin TV2, Solskjaer zbuloi se Carrick ka një anë të fortë dhe të pamëshirshme që jo të gjithë e njohin.
“Michael ka gjithçka që duhet për ta çuar përpara këtë klub. Ndoshta njerëzit nuk e shohin atë anë të tij, por ai e ka djallin brenda vetes. Edhe unë jam i tillë! Ne jemi jashtëzakonisht të ngjashëm”, u shpreh norvegjezi.
Solskjaer vlerësoi gjithashtu njohuritë që Carrick ka për historinë, tifozët dhe identitetin e Manchester United, duke e konsideruar atë njeriun e duhur për të drejtuar skuadrën.
Manchester United po kalon një nga periudhat më të vështira të viteve të fundit, me nëntë ndeshje radhazi pa fitore në të gjitha kompeticionet dhe një start kampionati që raportohet si më i dobëti në 40 vitet e fundit. Humbja 2-0 ndaj Chelseat ka shtuar edhe më shumë presionin mbi Carrick.
Ndërkohë, Solskjaer nuk e fsheh dëshirën për t’u rikthyer një ditë në stolin e “Djajve të Kuq”. Ai pranoi se ndjen ende një lidhje të veçantë me klubin, ku kaloi afro dy dekada si futbollist dhe trajner.
“Ndjej se kam ende punë të papërfunduar te Manchester United. Do të ishte bukur të kisha një tjetër mundësi. Nëse një ditë Michael qëndron për dhjetë vite dhe më pas vendos të largohet, ndërsa klubi më kërkon ta drejtojë skuadrën për dy muaj, sigurisht që nuk do të refuzoja”, deklaroi ai.
Solskjaer drejtoi Unitedin për rreth tre vite, pas 11 sezonesh si futbollist, gjatë të cilave fitoi dhjetë trofe madhorë.