Southamptoni është gati për të bërë një ofertë rekord për sulmuesin e Kombëtares së Shqipërisë. Sipas gazetarit Fabrizio Romano, “shenjtorët” do të ofrojnë 25 milionë stërlina për shërbimet e 20-vjeçarit, që këtë edicion ka shënuar pesë gola në Premier League dhe dy gola në Kupën e Ligës.
Broja i ka magjepsur të gjithë, duke dëshmuar se është një lojtar me shumë cilësi, i gatshëm për të shpikur gola nga hiçi, apo për të shërbyer për shokët e skuadrës në çdo lloj momenti. Blutë e Londrës i rinovuan kontratën sulmuesit në verë, duke nënshkruar për pesë sezone, por me afrimin e Romelu Lukakut e huazuan tek Southamton deri në fund të sezonit për t’i dhënë më shumë minuta.
Trajneri Thomas Thuchel pak ditë më parë u shpreh: “Broja është lojtar i yni”, duke treguar se e ka në konsideratë paraqitjen e Brojës dhe do të jetë pikërisht ai i cili do të thotë fjalën e fundit nëse do e lërë Brojën që të transferohet përfundimisht tek “Shenjtorët”.
25 milionë paundë është një shifër e konsiderueshme që me siguri do ta bëjë Chelsea-n të mendohet mirë, për shkak se bëhet fjalë për një lojtarë që është vetëm 20 vjeç.