Southampton kërkon të rikthejë Armando Brojën

Southamptoni mbetet i interesuar për sulmuesin shqiptar të Chelsea-t, Armando Broja, i cili është i tepërt në “Stamford Bridge”, raporton “Sky Sports”.

Broja pati një huazim zhgënjyes te Fulham në gjysmën e dytë të sezonit të kaluar, duke u paraqitur vetëm 8 ndeshje, pa mundur që të gjente rrugën e rrjetës. Pavarësisht përvojës zhgënjyese, shqiptari ka tërhequr interesin e disa klubeve këtë verë, përfshirë Evertonin dhe Milanin.

Sidoqoftë, Sky Sports ka sugjeruar që Southamptoni aktualisht është skuadra që shfaq interesin më të madh për të rimarrë 22-vjeçarin, i cili ka luajtur një vit i huazuar në sezonin 2021/22 te kjo skuadër.

Drejtuesit e Southamptinit duan të blejnë një sulmues për të shtuar konkurrencën ndaj dyshes Adam Armstrong-Ross Steëart pas skadimit të kontratës së Che Adams. Broja konsiderohet një opsion i mundshëm me Chelsean që supozohet se është i gatshëm të hyjë në bisedime për këtë lëvizje.

Blutë e Londrës kërkojnë 35 milionë paundë për sulmuesin, një tarifë që ka të ngjarë të ulet nëse “shenjtorët” do të këmbëngulin në mënyrë aktive për të përfunduar nënshkrimin.