Southampton përjashtohet nga “play-off”-i i Championship, akuza për spiunazh ndaj rivalëve

Një vendim i rëndë disiplinor ka tronditur futbollin anglez. Klubi i Southampton është përjashtuar nga faza “play-off” e EFL Championship, pas akuzave për spiunazh ndaj disa skuadrave rivale gjatë këtij sezoni.

Vendimi u mor nga Komisioni i Pavarur Disiplinor i EFL-së, pasi u konstatua se Southampton kishte monitoruar seancat stërvitore të Oxford United dhe Ipswich Town, ndërsa dyshohet se kishte filmuar në mënyrë të fshehtë edhe Middlesbrough përpara ndeshjes gjysmëfinale të “play-off”-it të zhvilluar më 7 maj.

Përveç përjashtimit të menjëhershëm nga gara, klubi është penalizuar edhe me heqjen e katër pikëve për sezonin e ardhshëm në kampionat. Si pasojë e këtij vendimi, Middlesbrough rikthehet në garë dhe do të përballet me Hull City në finalen e Wembley Stadium, ku do të diskutohet një vend në Premier League.

Southampton ka pranuar shkeljen e rregullave të garës, të cilat detyrojnë klubet të veprojnë me mirëbesim dhe ndalojnë monitorimin e kundërshtarëve gjatë 72 orëve para ndeshjeve direkte.

Megjithatë, klubi anglez ka ende të drejtën e apelimit dhe pritet të dorëzojë kërkesën për shqyrtim, ndërsa tifozët e prekur nga vendimi do të rimbursohen plotësisht për biletat e blera.