Spanja eliminon Portugalinë dhe kërcënon rekordin historik të Italisë!

Spanja vazhdon marshimin drejt trofeut të Kupës së Botës. “La Roja” mposhti Portugalinë me rezultatin 1-0 falë golit të Mikel Merinos në minutat shtesë të ndeshjes, duke siguruar kualifikimin në çerekfinalet e Kupës së Botës dhe duke konfirmuar statusin si një nga favoritët kryesorë për trofeun.

Përveç lojës bindëse të skuadrës së drejtuar nga Luis de la Fuente, edhe statistikat flasin në favor të spanjollëve. Deri tani, Spanja nuk ka pësuar asnjë gol në pesë ndeshjet e zhvilluara në këtë Botëror, duke dëshmuar një organizim të shkëlqyer në repartin defensiv.

Portieri Unai Simón ka hyrë gjithashtu në histori. Në fundin e ndeshjes ndaj Austrisë, ai theu rekordin e legjendës italiane Walter Zenga për minutat pa pësuar gol në Kupën e Botës, duke kaluar kufirin prej 517 minutash paprekshmëri.

Seria pozitive e Spanjës shtrihet edhe më tej. Duke llogaritur edhe ndeshjet e Kupës së Botës “Katar 2022”, “La Roja” numëron gjashtë sfida radhazi pa humbje në kohën e rregullt.

Madje, skuadra e De la Fuente është shumë pranë një tjetër rekordi historik. Spanja nuk ka pësuar humbje në 35 ndeshje radhazi dhe ndodhet vetëm dy takime larg barazimit të rekordit të Italisë së drejtuar nga Roberto Mancini, e cila regjistroi 37 ndeshje pa humbje, një nga seritë më të gjata në historinë e futbollit ndërkombëtar.