Spanja ka siguruar vendin e parë në Grupin H të Kupës së Botës pas fitores minimale 1-0 ndaj Uruguait, duke avancuar në fazën e 1/16-ave. Ndërkohë, përfaqësuesja uruguaiane është eliminuar në mënyrë surprizuese nga turneu.
Ndeshja u vendos në minutën e 42-të, kur Alex Baena realizoi golin e vetëm të takimit. Vendimtar rezultoi edhe gabimi i portierit veteran Fernando Muslera, i cili nuk arriti të kontrollonte një goditje relativisht të lehtë të spanjollit. Suksesi i siguroi Spanjës kreun e grupit, ndërsa Uruguai i dha fund rrugëtimit të tij në këtë Botëror.
Nga ana tjetër, në Grupin G, Belgjika dha një sinjal të fortë force duke mposhtur Zelandën e Re me rezultatin e thellë 5-1 në ndeshjen e zhvilluar në Vancouver. Belgët kaluan në avantazh falë golit të Leandro Trossard në pjesën e parë. Sulmuesi realizoi edhe golin e dytë personal menjëherë pas rifillimit të lojës. Më pas ishte radha e yjeve Kevin De Bruyne dhe Romelu Lukaku, të cilët thelluan diferencën në favor të skuadrës së drejtuar nga Garcia. Për Zelandën e Re shënoi Ben Just, ndërsa rezultatin përfundimtar 5-1 e vulosi futbollisti i Milanit, Alexis Saelemaekers.
Falë kësaj fitoreje bindëse, Belgjika e mbylli grupin në vendin e parë, e ndihmuar edhe nga barazimi mes Egjiptit dhe Iranit, si dhe nga diferenca më e mirë e golave.