Kombëtarja jonë ka pasur një vit 2019 të vështirë, me shumë probleme dhe rezultate me plotë ulje-ngritje. Nëse i hedhim një statistikave, ato nuk janë aspak premtuese. Vetëm 4 fitore në 10 ndeshje, 1 barazim dhe 5 humbje. Në duelin e parë në drejtimin e ekipit ishte Panucci, i cili do të shkarkohej për t’i lënë vendin trajnerit Edy Reja, i cili mori përkohësisht drejtimin e skuadrës.
22 mars, Shqipëri-Turqi 0-2
Fushata kualifikuese për “Euro 2020” nisi në mënyrën më të keqe të mundshme nën drejtimin e trajnerit Panucci, teksa u mundëm lehtësisht 2-0 nga Turqia në “Loro Boriçi”. Miqtë do të zhbllokonin rezultatin në minutën e 21-të, teksa nga gabimi i Gjimshitit erdhi dhe rrjeta e Burak Jëllmaz brenda zonës. Kuqezinjtë provuan pa sukses të rikthenin baraspeshën madje në një rast pretenduan për penallti me Uzunin. Në minutën e 55 Turqia shënoi dhe golin e dytë me një zbritje të shpejtë në sulm që u finalizua në mënyrën më të bukur. Çallhanoglu arriti që të mposhtë Etrit Berishën.
23 mars, shkarkohet Panucci
Federata Shqiptare e Futbollit ndërpreu bashkëpunimin me trajnerin Christian Panucci. Strategu italian mori drejtimin e kuqezinjve në verën e 2017-ës, ku zëvendësoi Gianni De Biasin, ndërsa debutoi me ndeshjet kundër Lichtensteinit dhe Maqedonisë.
25 mars, Andorra-Shqipëri 0-3
Shqipëria fitoi me Andorra-n duke siguruar kështu 3-pikëshin e parë të kualifikueseve të “Euro 2020”. Në minutën e 21-të, Armando Sadiku përfitoi nga një gabim i vendasve në mbrojtje. 3 minuta nga fundi i kohës së rregullt, ishte një gabim i vendasve që i dha mundësinë Balajt që të rrëmbejë një top dhe të shënojë golin e dytë të kësaj sfide. Në minutat shtesë, Abrashi do ta kishte të thjeshtë për të shënuar golin e tretë.
8 qershor, Islandë-Shqipëri 1-0
Edy Reja debutoi me një humbje minimale ndaj Islandës në transfertë. Kuqezinjtë pësuan gol në minutën e 22-të, teksa për vendasit do të shënonte Gudmundsson. Kombëtarja jonë kishte disa raste të mira shënimi por mungonte finalizimi ku Balaj dhe Cikalleshi nuk ishin në ditët e tyre më të mira.
11 qershor, Shqipëri-Moldavi 2-0
Shqipëria mori një fitore të thjeshtë me 2 gola ndaj Moldavisë. Goli për Shqipërinë u realizua vetëm në minutën e 66-të, teksa Sokol Cikalleshi shënoi i pari në portën e Moldavisë. Kur ndeshja ishte pranë përfundimit, Ylber Ramadani dyfishoi rezultatin në minutën e 93-të, duke i dhënë kuqezinjve një fitore bindëse.
7 shtator, Francë-Shqipëri 4-1
Shqipëria humbi 4-1 përballë kampionëve të botës në futboll, duke iu larguar ëndrrës për kualifikimin në Europianin 2020. Sfida nisi me një gabim trashanik të vendasve që në dy raste vendosën himne të gabuara, teksa u detyruan më pas që të kërkonin falje, por nuk i shpëtuan një gjobe nga UEFA. Ndeshja do të kishte pak histori, teksa Coman do të shënonte dy herë në minutën e 8të dhe të 68-të, ndërkohë që Giroud dhe Ikone do të realizonin dy golat e tjerë. Golin e nderit për kuqezinjtë tanë e shënoi Cikalleshi me penallti në fundin e kohës së rregullt.
10 shtator, Shqipëri-Islandë 4-2
Kuqezinjtë bënë një ndeshje spektakolare ndaj islandezëve në “Elbasan Arena”. Pjesa e parë është mbyllur me rezultatin 1-0 me gol të Kastriot Dermakut, me goditje me kokë. Në pjesën e dytë janë shënuar edhe 3 golat për kuqezinjtë me autor: Hysaj, Roshi dhe Cikalleshin. Për miqtë do të gjende dy herë rrugën e rrjetës Sigurðsson.
11 tetor, Turqi-Shqipëri 1-0
Kombëtarja u mund rezultatin 1-0 në sfidën e luajtur në Stamboll. Kuqezinjtë, edhe pse treguan një lojë të mirë pësuan në minutën e 90-të, duke çuar dëm përpjekjet e bëra gjatë takimit. Cenk Tosun realizoi duke përfituar nga një mosmarrëveshje mes Ismajlit dhe Strakoshës.
14 tetor, Moldavi-Shqipëri 0-4
Kuqezinjtë morën një fitore spektakolare me 4 gola në transfertë. Cikalleshi zhbllokoi sfidën në minutën e 22-të, ndërkohë që Bare dhe Trashi shënuan në fraksionin e parë. Në fundin e kohës së rregullt, do të festonte edhe Manaj.
14 nëntor, Shqipëri-Andorra 2-2
Kombëtarja nuk arriti të fitonte kundër Andorrës duke barazuar me rezultatin 2-2 në “Elbasan Arena”. Ndeshja nisi mjaft mirë për ne duke shënuar gol që në minutën e 6-të me anë të Bekim Balajt. Pas 12 minutash miqtë barazojnë me Martinez i cili realizoi edhe golin e dytë në minutën e 49-të. Manaj do të rikthente baraspeshën duke vulosur edhe rezultatin përfundimtar në minutën e 55-të në 2-2.
17 nëntor, Shqipëri-Francë 0-2
Ishte një ndeshje historike për kuqezinjtë pasi u përurua stadiumi i ri Kombëtar, por sërish francezët nuk falën. Në minutën e 8-të, Corentin Toliso gjeti lehtësisht golin në një goditje dënimi të Griezmann. 10 minuta nga përfundimi i pjesës së parë, francezët gjetën golin e dytë në një pasaktësi të mbrojtjes shqiptare. Antoine Griezmann nuk e pati të vështirë të shënonte. /Rozalb Lika-Koha Jone/