Real Madridi po vendos standardin më të lartë në Europë sa i përket të ardhurave nga stadiumi. Sipas të dhënave të sezonit 2024/25, klubi madrilen është i vetmi që ka kaluar pragun e 200 milionë eurove nga ndeshjet në shtëpi, duke regjistruar plot 236,6 milionë euro, falë transformimit të Santiago Bernabéut në një motor të vërtetë biznesi.
Pas “Los Blancos” renditen dy gjigantë të Premier League: Manchester United me 190,7 milionë euro dhe Arsenal me 183,0 milionë euro, ndërsa jashtë podiumit mbeten PSG dhe Barcelona, kjo e fundit e penalizuar nga punimet dhe zhvendosja e përkohshme për shkak të rinovimit të Camp Nou.
Në Itali, klubi që gjeneron më shumë të ardhura nga ndeshjet në stadium është Interi, me 103,6 milionë euro, duke u renditur i 9-ti në Europë. Një ndikim të madh në këtë shifër kanë pasur sidomos mbrëmjet e Champions League, që sjellin rritje të ndjeshme të të ardhurave nga biletat dhe shërbimet në stadium.
Në vendin e dytë në Serie A është Milani me 69,5 milionë euro, ndërsa Juventusi mbyll treshen me 65,4 milionë euro. Megjithatë, edhe pse Interi kryeson në Itali, hendeku me klubet elitare europiane mbetet i thellë, veçanërisht me Real Madridin, i cili po e shndërron stadiumin në një burim të vazhdueshëm të ardhurash gjatë gjithë vitit.
Pesha e të ardhurave nga stadiumi në raport me xhiron totale të klubeve:
Interi: 19%
Milani: 17%
Juventusi: 18%
Real Madridi: 20%, në një faturim që tashmë ka kaluar 1 miliard euro
