Tentativë grabitjeje në shtëpinë e Yamal, teksa ylli spanjoll festonte kualifikimin në finalen e Botërorit

Ndërsa Lamine Yamal po festonte 19-vjetorin e lindjes dhe kualifikimin e Spanjës në finalen e Kupës së Botës 2026, persona të paidentifikuar tentuan të grabisnin banesën e tij në Esplugues de Llobregat, pranë Barcelonës.

Sipas raportimeve të së përditshmes spanjolle La Vanguardia, tentativa për grabitje dështoi falë ndërhyrjes së menjëhershme të ekipit privat të sigurisë së futbollistit. Rojet vunë re lëvizje të dyshimta përmes kamerave të sigurisë dhe reaguan në kohë, duke detyruar autorët të largoheshin pa arritur të hynin në banesë.

Në të njëjtën zonë, gjatë orëve të mëngjesit, u raportuan edhe dy grabitje të tjera në banesa private. Megjithatë, autoritetet nuk kanë konfirmuar ende nëse bëhet fjalë për të njëjtët persona që tentuan të hynin edhe në shtëpinë e yllit të kombëtares spanjolle.

Pas incidentit, stafi i sigurisë së Yamal paraqiti kallëzim në polici, e cila ka nisur hetimet për të identifikuar autorët dhe për të zbardhur rrethanat e ngjarjes.

Sipas dyshimeve të para, objektivi i grabitësve mund të ketë qenë koleksioni i bizhuterive dhe orëve me vlerë që zotëron futbollisti, edhe pse motivi i saktë do të përcaktohet vetëm pas përfundimit të hetimeve.

Banesa e Lamine Yamal nuk është përmendur për herë të parë në mediat spanjolle. Ajo ka qenë më parë rezidencë e ish-mbrojtësit të Barcelonës, Gerard Pique, dhe këngëtares së njohur kolumbiane, Shakira.