Tërbuni dhe Bylis “udhës” drejt Superiores, Shtrepi: Tomorit, ja pse “iu ça rrjeta”!

Sporti E Diel, 18 Prill 2021 22:51

Tërbuni i Pukës është vetëm një hap larg historisë. Askush nuk e ndal dhe nuk ka pengesa për këtë skuadër në një asnjë ndeshje të pjesës së dytë të këtij sezoni. Tërbuni vazhdon regjistrimin e fitoreve të njëpasnjëshme duke ruajtur kështu kreun e grupit A. Skuadra e drejtuar nga tekniku shkodran Elvis Plori ka shënuar fitore të thellë me shifrat 6-1 në “Ismail Xhemali” ndaj Kamzës. Fitore kanë shënuar dhe dy skuadrat e vendit të dytë dhe tretë Mamurrasi dhe Besëlidhja brenda në shtëpi, përkatësisht ndaj Ilirisë dhe Burrelit, por për ngjitjen në një kategori më lart, të dyja këto skuadra presin një hap falas të kundërshtarit të tyre.

Ndërkohë në grupin B, Bylisi shfrytëzon tolerimin e Tomorit gati “inekzistent”, duke e mposhtur me rezultatin e thellë 10-0. Fitore e cila e çon automatikisht në krye të grupit të jugut, me golavarazh më të mirë se Lushnja, duke lënë “lagunarët” në vend të dytë, dhe pse me pikë të barabarta. Një javë më parë FSHF e ngjiti gabimisht në krye Bylis, dhe e korrigjoi më pas. Por për gabimin e FSHF-së duket se mendoi Tomori i Beratit, rezultat që ka revoltuar Lushnjën, e cila ka pasur një ecuri pozitive dhe kryesonte deri në fundjavë.

Por edhe tifozët beratas janë revoltuar me lojtarët dhe klubin për rezultatin e turpshëm që skuadra e tyre shënoi sot në Ballsh ndaj Bylisit.

Në rrjetet sociale, tifozët akuzojnë klubin e tyre për tolerim ndeshjeje ndaj ekipit ballshiot.- “Një humbje e turpshme sot përballë ekipit ballshiot, ku përgjegjësia padyshim është e të gjithëve. Tomori nuk është krijuar për t’u tallur ju, o njerëz pa zëmër, o njerëz pa sedër, dhe mbi të gjitha njerëz të paaftë. Deri dje kemi qenë ne ata që kemi mbrojtur futbollistët nga çdo humbje, por a justifikohet një turp i tillë? Hiqeni atë fanellë nga trupi dhe largohuni nga Tomori, kjo është e vetmja gjë që sportdashësit beratas kërkojn nga ju!”. Ndërkohë, që edhe Lushnja ka reaguar ashpër mbi këtë rezultat të çuditshëm. Tomori luajti me formacionin e dytë, për të justifikuar humbjen e thellë.