Tirana e Egbo është e frikshme, merr fitoren e 8 radhazi ndaj Vllaznisë (VIDEO)

Tirana vazhdon të fitojë me ndihmën e Zotit siç edhe e ka cilësuar trajneri Egbo. Bardheblutë arritën një fitore shumë të vështirë 1-0 në “Loro Boriçi” duke marrë përkohësisht kreun e renditjes me 40 pikë, dy më shumë se Kukësi.

Tirana do të ishte më dominuese në minutat e para duke pasur kontrollin e topit. Shansi i parë në portën e shkodranëve do të vinte në minutën e 23-të, teksa Cale gjen hapësirën për të gjuajtur drejt portës por sfera kalon pak mbi traversën e Sherrit. 2 minuta më pas bardheblutë dalin rrezikshëm me një kundërsulm të shpejt, por Ngoo nxitohet në goditje. Vllaznia e ka shumë të vështirë për të rrezikuar, teksa Lika mundohet që më krosimet e tij të vendosë në vështirësi mbrojtjen kryeqytetase. 1 minutë nga fundi i fraksionit të rregullt, Batha rrezikon portën me një goditje me kokë, teksa në rrëmujën e krijuar në zonë, Ngoo nuk arrin që ta devijojë topin në rrjetë.

Edhe fillimi i pjesës së dytë nis nën diktatin e skuadrës së Egbo që hidhet në sulm në kërkim të golit të avantazhit. Vllaznia krejt ndryshe nga fraksioni i parë krijon një shans të mirë shënimi të Likës, por Zogaj nuk gjen kohën e  duhur për të goditur. 10 minuta më pas, Vllaznia pretendon për penallti, por gjyqtari Hamiti bën shenjë që loja të vazhdojë ndonëse Muça shtyu Junior në zonë.

4 minuta nga fundi i kohës së rregullt, Cobbinah arrin që të shënojë një gol të bukur me një goditje në hyrje të zonës. Një kundërsulm perfekt i bardhebluve, ndërkohë që jo pak kishte edhe portier Sherri që nuk arrin të largojë topin në tentativë për ta larguar. Ekipi i Egbo administroi deri në fund këtë rezultat, duke marrë fitoren e 8-radhazi nën drejtimin e strategut të njohur. Një ecuri e jashtëzakonshme që nuk ka ndodhur asnjëherë më parë në ekipin bardheblu. /R.Lika-Koha Jone/