Një pjesë e historisë së futbollit botëror është shitur në ankand. Bëhet fjalë për topin Adidas Azteca të përdorur në ndeshjen legjendare mes Argjentinës dhe Anglisë në Kupën e Botës “Meksikë 1986”, ku Diego Armando Maradona realizoi golat e famshëm të “Dorës së Zotit” dhe “Golit të Shekullit”.
Topi ikonë është shitur për 3.35 milionë dollarë, rreth 2.9 milionë euro, në një ankand të organizuar nga Heritage Auctions në Dallas. Shitja tërhoqi vëmendje të madhe ndërkombëtare, edhe pse çmimi përfundimtar ishte dukshëm më i ulët se parashikimet fillestare. Para ankandit, ekspertët kishin vlerësuar se topi mund të arrinte një çmim prej afro 10 milionë dollarësh, ndërsa oferta fillestare ishte vendosur në 2.5 milionë dollarë.
Objekti ka një vlerë të jashtëzakonshme historike, pasi është përdorur në përballjen e 22 qershorit 1986 mes Argjentinës dhe Anglisë, një nga ndeshjet më të famshme në historinë e Kupës së Botës.
Në atë takim, Maradona shënoi dy gola që do të mbeteshin përgjithmonë në historinë e futbollit. I pari ishte “Dora e Zotit”, ndërsa i dyti u cilësua më pas si “Goli i Shekullit”, pas një aksioni spektakolar ku argjentinasi dribloi disa kundërshtarë përpara se të dërgonte topin në rrjetë.
Në ankand u përfshi edhe dokumentacioni që vërteton autenticitetin e topit, së bashku me fotografi dhe një letër të firmosur nga arbitri tunisian Ali Bennaceur, i cili drejtoi atë ndeshje historike.
Bennaceur e kishte ruajtur topin për më shumë se 30 vjet në shtëpinë e tij në Tunizi, përpara se të vendoste ta nxirrte në ankand. Një top që dikur ishte thjesht pjesë e një ndeshjeje futbolli tashmë është kthyer në një objekt koleksionist me vlerë miliona dollarë, i lidhur përgjithmonë me një nga kapitujt më të famshëm të karrierës së Maradonës.