Topi i “Dorës së Zotit” të Maradonës del në ankand, mund të arrijë 10 milionë dollarë

Topi me të cilin Diego Armando Maradona shënoi një nga golat më të famshëm në historinë e futbollit, atë të njohur si “Dora e Zotit”, do të dalë në ankand nga Heritage Auctions më 21-23 gusht.

Çmimi fillestar për këtë relike historike është vendosur në 2.5 milionë dollarë, por pritshmëritë janë shumë më të larta. Sipas parashikimeve, topi mund të shitet për një shumë që varion nga 9 deri në 10 milionë dollarë.

Bëhet fjalë për topin me të cilin Maradona shënoi golin e diskutueshëm ndaj Anglisë në çerekfinalen e Kupës së Botës 1986, duke mposhtur portierin Peter Shilton. Goli, i realizuar me dorë, mbeti në histori si një nga momentet më ikonike të futbollit dhe u pagëzua nga vetë Maradona si “Dora e Zotit”.

Interesi për objektet e lidhura me legjendën argjentinase është rritur ndjeshëm vitet e fundit. Në vitin 2022, fanella që Maradona kishte veshur në të njëjtën ndeshje u shit për 9.3 milionë dollarë, duke vendosur një rekord të rëndësishëm për një uniformë sportive.

Në të njëjtën kohë, tregu i koleksionistëve po njeh një zgjerim të jashtëzakonshëm, me rekorde të reja që vendosen çdo vit për kartat sportive, objektet e rralla dhe reliket e kulturës pop.

Aktualisht, jashtë veprave të artit, një nga objektet më të shtrenjta të koleksionueshme të shitura ndonjëherë është një kartë Pokémon “Pikachu Illustrator” e vlerësuar PSA 10, e cila është shitur për plot 16.5 milionë dollarë.