Tottenham pranë Marmoush, marrëveshje verbale me sulmuesin e Cityt

Tottenham po përshpejton lëvizjet në merkato dhe, pas marrëveshjes për Savinhon, klubi londinez është pranë një tjetër transferimi të rëndësishëm nga Manchester City.

Sipas raportimeve të Sky Sports UK, Tottenham ka arritur një marrëveshje verbale me Omar Marmoush për transferimin e sulmuesit egjiptian në Londër. Negociatat mes palëve kanë nisur dhe operacioni mund të mbyllet së shpejti, nëse nuk ka ndonjë surprizë në ditët në vijim.

Marmoush iu bashkua Manchester Cityt në janar të vitit 2025, pas shpërthimit të tij me fanellën e Eintracht Frankfurtit. Sulmuesi ka ende kontratë me kampionët e Anglisë deri në vitin 2029, por nuk ka arritur të ketë hapësirën e dëshiruar në formacion.

Prania e Erling Haaland në repartin ofensiv ka kufizuar minutat e egjiptianit, i cili tani mund të jetë në kërkim të një aventure të re për të rikthyer veten në qendër të vëmendjes.

Te Eintracht Frankfurti, Marmoush ishte një prej protagonistëve kryesorë, duke spikatur për shpejtësinë, teknikën dhe aftësinë për të shënuar. Pikërisht këto karakteristika kanë bindur Tottenhamin se ai mund të jetë një pjesë e rëndësishme e projektit të klubit.

Tani, objektivi i Spurs është të bindë Manchester Cityn për të dhënë dritën jeshile përfundimtare të transferimit sa më shpejt të jetë e mundur.

Klubi anglez, që po kalon një proces rinovimi të skuadrës, duket i gatshëm të shqyrtojë disa largime për të krijuar hapësirë dhe financuar investime të reja në merkato.