Francesco Totti ka folur publikisht, duke konfirmuar kthimin e tij të mundshëm te Roma. Ish-kapiteni legjendar i verdhekuqve, në një intervistë për Sky Sport, deklaroi se bisedimet për rikthimin e tij në klub po ecin me shpejtësi dhe se ai shpreson të kthehet së shpejti. Totti theksoi se Roma mbetet gjithmonë shtëpia e tij, pavarësisht se nuk ka qenë pjesë e klubit në vitet e fundit. Ai shtoi se zërat për rikthimin e tij janë të vërteta dhe se po diskutohen detaje për të gjetur zgjidhjen më të mirë për të gjithë palët.
Gjatë intervistës, Totti zbuloi gjithashtu se kishte darkuar me trajnerin Gian Piero Gasperini disa javë më parë, ku të dy shprehën interesin e ndërsjellë për të punuar së bashku. Ai vlerësoi punën e Gasperinit, duke thënë se po bën një punë të shkëlqyer dhe ka pasur një ndikim të rëndësishëm, ndërsa skuadra po bën shumë mirë në përpjekje për t’u kthyer në Champions League. Biseda mes tyre nuk ishte vetëm për futbollin, por për gjithçka.
Këto deklarata të rëndësishme, të bëra në kuadër të një eventi të Betsson, pritet të gëzojnë pa masë tifozët e Romës. Çështja kryesore e diskutimit ka qenë roli që do të ketë Totti në klub. Megjithatë, duket se është arritur një marrëveshje: një rol si konsulent i jashtëm për muajt e parë, i ndjekur nga një pozicion më i konsoliduar brenda klubit. Pronarët Friedkin dëshirojnë të përfitojnë nga figura e Tottit si ambasador për qindvjetorin e klubit dhe për projektin e stadiumit të ri, si dhe si një figurë sportive me ndikim.
Marrë nga La Gazzetta dello Sport