Tragjedi gjatë finales së Ligës së Kombeve, tifozi gjerman bie nga tribuna dhe humb jetën

Një ngjarje tragjike ka ndodhur gjatë finales së Nations League mes Portugalisë dhe Spanjës, e zhvilluar mbrëmjen e kaluar në Allianz Arena të Mynihut. Një shtetas gjerman ka humbur jetën pasi ra nga tribuna e sipërme në zonën e sallës së shtypit, gjatë kohës shtesë të ndeshjes.

Sipas të përditshmes gjermane Bild, viktima, banor i Garmisch-Partenkirchen, ka rënë nga një lartësi prej rreth tetë metrash. Pavarësisht ndërhyrjes së menjëhershme të shërbimeve emergjente, përfshirë zjarrfikësit dhe shërbimin mjekësor, përpjekjet për ta reanimuar nuk patën sukses.

Policia gjermane ka nisur një hetim për të sqaruar rrethanat e aksidentit tragjik. Në përfundim të ndeshjes, trajnerët e dy kombëtareve finaliste, Luis de la Fuente (Spanjë) dhe Roberto Martínez (Portugali), shprehën ngushëllimet e tyre më të thella për familjen dhe të afërmit e viktimës.