Trajneri i Portugalisë hap derën për Cristiano Ronaldon: Mund të rikthehet kur të dojë!

Pas fitores 2-1 të Portugalisë ndaj Norvegjisë në “Estádio do Dragão”, trajneri Jorge Jesus ka tentuar të ulë temperaturën e debatit me Cristiano Ronaldon dhe ka lënë të hapur mundësinë e rikthimit të kapitenit në kombëtare.

Në deklaratën e tij pas ndeshjes, Jesus e cilësoi përplasjen me yllin portugez si një keqkuptim që, sipas tij, mund të zgjidhet pa vështirësi. Trajneri theksoi se nuk dëshiron t’i mbyllë dyert golashënuesit më të mirë në historinë e Portugalisë.

“Për mua, gjithçka është e hapur. Ai duhet të vendosë për të ardhmen e tij përpara grumbullimit. Nëse luan dhe dëshiron të jetë pjesë e kombëtares, mund të rikthehet kur të dojë. Pse jo?”, deklaroi Jesus.

Megjithatë, trajneri portugez konfirmoi se nuk ka ndërmend t’i kërkojë falje Ronaldos për situatën e krijuar në ndeshjen e parë ndaj Norvegjisë, ku sulmuesi u nxeh për të hyrë në fushë, por në fund nuk u aktivizua.

Sipas Jesus, raste të tilla janë pjesë normale e futbollit, ndërsa situata mori përmasa më të mëdha për shkak të emrit të Ronaldos, të cilin ai e cilësoi sërish si një simbol të Portugalisë.

Në përpjekje për të zgjidhur situatën, Federata Portugeze e Futbollit po punon për të organizuar një takim mes dy protagonistëve. Jesus ka shprehur gatishmërinë për t’u ulur në bisedime, ndërsa pritet përgjigjja e Ronaldos.

Edhe presidenti i federatës, Pedro Proença, ka dalë në mbështetje të kapitenit. Ai e cilësoi Ronaldon si “lojtarin më të mirë në historinë e futbollit” dhe “ikonën” e Portugalisë.

“Cristiano është pjesë e kombëtares dhe do të jetë gjithmonë këtu kur trajneri ta dëshirojë. Ajo që ndodhi mes tij dhe Jorge Jesus ishte thjesht një keqkuptim që duhet zgjidhur brenda familjes së futbollit portugez”, u shpreh Proença.