Egnatia luan sot një nga ndeshjet më të rëndësishme në historinë e klubit. Kampionët e Shqipërisë përballen në transfertë me Lillestrøm në sfidën e kthimit të play-off-it të UEFA Europa League, me kualifikimin ende plotësisht të hapur.
Pas barazimit pa gola në “Arena Egnatia”, të dyja skuadrat nisen nga e njëjta pikë. Rrogozhinasit zhvilluan një paraqitje të disiplinuar në takimin e parë, duke u mbrojtur mirë dhe duke krijuar mundësi për shënim, por pa arritur të gjejnë rrjetën.
Tashmë, skuadra e Nevil Dedes duhet të bëjë një tjetër paraqitje të fortë, këtë herë në tokën norvegjeze. Një fitore në “Åråsen Stadion” do t’i siguronte Egnatias kualifikimin në fazën e ligës së Europa League, duke i dhënë klubit shqiptar një tjetër sukses të madh në arenën ndërkombëtare.
Ndeshja e kthimit mes Lillestrøm dhe Egnatias do të zhvillohet sot në Norvegji. Pas rezultatit 0-0 në Rrogozhinë, çdo gol mund të jetë vendimtar në përcaktimin e skuadrës që do të vijojë më tej.
Egnatia e ka të garantuar tashmë pjesëmarrjen në fazën e ligës së UEFA Conference League, por kampionët shqiptarë kërkojnë më shumë. Objektivi është Europa League dhe mundësia për të shkruar një tjetër faqe historike për klubin dhe futbollin shqiptar.