Uellsi kalon në gjysmëfinale, 3-1 me Belgjikën

Uellsi ka shkruar historinë me këtë debutim të suksesshëm duke mbërritur deri në gjysmëfinalet e Euro 2016.

Uellsianët triumfuan  në stadiumin Stade Pierre-Mauroy kundër Belgjikës me rezultatin 3:1.

Ishin belgët ata që shënuan të parët, por mesfusha cilësore e uellsianëve ndërtoi aksione aq sa për të përmbysur rezultatin me 3 gola.

Radja Nainggolan me një goditje të fuqishme prej rreth 30 metrave në minutën e 13-të takimit, kapi në befasi portierin Hennessey duke dërguar topin në rrjetë.

Ekipit të Gareth Bale iu desh 18 minuta kohë që të barazonin rezultatin për të bërë më tutje edhe përmbysjen e madhe.

Kapiteni dhe qendërmbrojtësi Ashley Williams hapi rrugën e shënimit të tre golave me një gol me kokë të ardhur nga kornia.

Në pjesën e dytë u prit që belgët të kthejnë epërsinë, por ndodhi e kundërta pasi  Uellsi shënoi edhe golin e dytë në këtë takim.

Kur pritej të përfundonte takimi, në të 85-tën minutë Sam Vokes realizoi golin e tretë dhe të nokautit për belgët dhe kështu, ndeshja përfundoi 3:1 për Uellsin.

Pas kësaj fitore, Uellsi në gjysmëfinale do të takohet me Portugalinë, e cila eliminoi mbrëmë pas penalltive Poloninë.

Në këtë ndeshje do të kemi  përballjen interesante mes dy futbollistëve të Real Madridit, Gareth Balet dhe Cristiano Ronaldos.