United eliminohet nga EFL Cup, Brighton përmbys gjithçka në “Old Trafford”

Manchester United është eliminuar nga EFL Cup që në raundin e tretë, pas një humbjeje spektakolare 3-2 ndaj Brighton në “Old Trafford”.

“Djajtë e Kuq” e nisën ndeshjen në mënyrën më të mirë të mundshme, duke shënuar dy gola të shpejtë. Shea Lacey zhbllokoi rezultatin në minutën e 8-të, pas asistimit të Tielemans, ndërsa vetëm dy minuta më vonë Mason Mount dyfishoi avantazhin e vendasve.

Megjithatë, Brighton nuk u dorëzua dhe arriti të rikthehej në lojë pak para pushimit. Në minutën e parë shtesë të pjesës së parë, Charalampos Kostoulas shënoi golin që rihapi takimin.

Në pjesën e dytë, miqtë u shfaqën dukshëm më agresivë dhe kërkuan me ngulm përmbysjen. Përpjekjet e Brighton u shpërblyen në minutën e 65-të, kur Pascal Groß realizoi golin e barazimit.

Vetëm pesë minuta më vonë, Maxim De Cuyper kompletoi përmbysjen, duke shënuar golin e tretë për Brighton dhe duke vulosur fitoren 3-2.