United fiton duelin direkt ndaj Sheffield, super Martial me tripletë (VIDEO)

Manchester United fiton duelin direkt ndaj Sheffield United në garën për zonën Champions dhe vazhdon t’i bëjë presion Chelsea-t për vendin e katërt. “Djajtë e Kuq” triumfuan 3-0 falë një Anthony Martial në formë të jashtëzakonshme.

Sulmuesi francez shënoi të tre golat e skuadrës së Ole Gunnar Solskjaer, por nuk duhet anashkaluar edhe kontributi i Marcus Rashford me dy asiste.

Martial realizoi dy herë vetëm në pjesën e parë, në minutat 7’ dhe 44’. Në rastin e parë u shërbye nga Rashford, ndërsa në të dytin shfrytëzoi pasimin e saktë rrafsh me tokën të Wan-Bissakas.

Goli i tretë i shënuar nga francezi ishte si lojë fëmijësh, falë zgjuarsisë së Rashfrod, që e nxori të lirë përballë portierit në minutën 74’.

Dominimi i “Djajve të Kuq” vijoi edhe në minutat e fundit, por pa mundur ta thellonin më tej diferencën.